ناس وناس وناس

موضوع: ناس وناس وناس السبت 20 يونيو 2009, 12:36 am

هناك ناس تكرههم من اوّل ليله
وهناك ناس ما يهُونوا سْنين طويله
* * *
هناك ناس حبايب
وهناك ناس تكرهْم بْغير سبايب
ولا عقل عامر كيف عقل الخايب
ولا وْجوه تَنْدى كي وجوه بخيله
* * *
هناك ناس يا مَحْلاهم
وهناك ناس ما تَقْدر تعيش بلاهم
وهناك ناس حسْدِيَّه وسُود نْياهم
ثْياب بِيض من بَرَّه وجَوَّه نِيله
* * *
هناك ناس غَوالي
حتى ان باعَدوا ما كَيفْهم لا والي
حمَّالين للسَّيَّه بْطَوعة بالي
علي خطّْهم ما عندهم تحْويله
وهناك ناس عشْرتْهم خَطَا طَوّالي
مكتوب في جباهِهم خَراب العَيله
وهناك ناس تعْزم واليدَيْن خَوالي
وهناك ناس تَبْخل والجّيُوب ثقيله
هدايات مالرّب الكريم العالي
وبُو طَبْع ما تنفع مْعاه الحيله
* * *
هناك ناس ما تَقْبلهم
وهناك ناس لك غايه تْجول لْهَلهم
وهناك ناس لا دارَوْا خَطَا تحملهم
وهناك ناس في عَقْلك لهم تجْفيله
وهناك ناس عالحَيِّين لا تجْملْهم
اللي تْجيك منهم مالْها تبديله
ولا يفْرقْوا ظنِّي الا بْعَمَلْهم
ما حَدْ علي التّسْعه مْزَوّد لَيْله
وهناك ناس ما يَنْسوا اللي صارْلهم
يردُّوه بعْباره ووافي كَيْله
وهناك ناس لا هبّْ الهْبوب خَبَلْهم
ونسْيَوا اللي عدَّى وضاع جميله
ولا خير في اللي ما يْبات عَلَلْهم
ولا في الخَلِيل ان كان فاتْ خليله
* * *
هناك ناس يا مَبهاهم
وهناك ناس تُوعدْهم وما تَلقاهم
وان قابلتهم تَلقى العَذَارْ معاهم
مْجَهّْزيَّنه ما عندهم تعْطيله
كلامْهم اللي قالَوْه ضدّ نْياهم
ان كان بَحّروا ينْوُوا على التّقبِيله
احتار في مْوَدّتهم اللي ماشاهم
مربّْيِينَّه شاطب وحَار دليله
لصحاب كيف في صفّ العدو تلقاهم
صحْبتْهم مْعاك مغير نَصْب وحِيله
قِريب نقْصهم منَّك بعيد وفاهم
مَشْيُول عالدّبَر في حمْلهم تمْيِيله
مفتوح عالخْساره بَيْعهم وشْراهم
السّتْرَه مْع بو صَحْبَين قليله
* * *
هناك ناس اماره
وهناك ناس ما ظنِّي يساوُوا باره
وهناك ناس تلقى سَعْيهم في الكاره
وأرزاق واجْدَه غير النّفوس بخيله
والمال في قليل العزْم راهْ خْساره
حتى وهُو حَكيم بعلْم في تعديله
وهناك الفقير وما يسَيّب عاره
حتى إن كان ما عنده الْيَدّ طويله
وإن ما كان في جَيْبه قضي من جاره
علي قيْس نِيتَه ربّْنا يعطي له
مَوْكار الصْقُوره ما تْجيه حْبَارى
ولا مْرَوّمَه تَلْحَق ثمَنْ لاِصيله
وحظّك اللي ترْميه مالبذّاره
يَطْلع بْعَينه تحْصدَه وتْشِيله
والجَّدِي لو تقَوَّى نين فات حَكاره
ان يَبْقى علي شَيْل الحْمُول هَزيله
وشْوف الجمّل حتى إن خفّ عْباره
صِليبه علي حمْلَه اخْرى ترْمِي له
شديد العَصَب حَمَّال في مشواره
قطّاع الفيافي وين مَدّ رحيله
إن راد ربّْنا ما حَدْ يسيِّب كاره
الرّاس راسْ والواطي ان زال وذيله
* * *
هناك ناس يا مَبسَلْهم
لا غَريب يَقْبلهم ولا من هَمْهم
وهناك ناس في الحَيِّين شَيْن عَملْهم
ذكَرْ نخِيل لا رَمْيَه ولا تظْلِيله
عَلْقم وحَنْظل وين ما تاكلهم
وان رافقتهم يبْقَوا عليك عَدِيله
وان نازلتهم بالدّار جار لْهَلهم
علَيْ عيْب عَيّل يجْردُوا بالعَيْله
علي جارهم ديما يزيد عَلَلهم
قْلال الْعنَا لا جَتْ الدَّلو ثقيله
* * *
هناك ناس تكرههم من اوّل ليله
وهناك ناس ما يهُونوا سْنين طويله

ينقصها فقط ذكر الشاعر

القصيدة للشاعر سعيد شلبي
اختيارك موفق

وحبيت نضيف عليها

هناك ناس تلقاهم اجواد وخيرة وهناك ناس خلطتم ذهابة شيرة
هناك ناس ايعزوا معاك وينما تطلب افزاع ايفزوا
لا يبخلوا لا من حمول لا يكزوا اجواد طبعهم فزعة لقولة ديرة
ايشيلوا الطايح والنزاع ايحزوا كمين نفس زهزها بعد تكديرة
وهناك ناس من رحمة الله التزوا بها تنال خلطتم ذهابة شيرة
حتي فالهم يقهر تقول ايعزوا يمتازوا ايجوا للفرح بالتكشيرة
هناك ناس اقوالي عليهم تخيل وما انفضي بالي
يعتز بنباهم من عليه غوالي دواء للمريض وللقنيد جبيرة
قدارة ظروف اللي عليهم جالي يستانس الخايف من الطليب وغيرة
وهناك ناس اكيدة ايعدوا اللومة يحسبوا البعيدة
لا كذب لا تعذير لا ترديدة ايعدوا اللومة لو تكون عسيرة
اصحاب النخاوة والعزوم شديدة ع المبدا يموتوا مالهم توخيرة
وان جاهم اللي مظلوم يجلا كيدة يبات في الحما لا ظلم لا تصغيرة

عزيزتي فيروز شكرا لمرورك الذي دائما يضيف لمسة جمال لصفحتي

دمتي لؤلؤة المنتدي

أما أنت ياروح المنتدي لااقول إلا دمت سند لي وشمعة نتير صفحاتي

دمت شامخا كالصقر

اختيرك رائع جدا الى الامام ان شاء الله

الاخ امير الاردن
شكرا جزيلا علي مرورك